METEOROLOGIÝANYŇ ESASLARY BOÝUNÇA TEST BÄSLEŞIGI GEÇIRILDI

Hormatly Prezidentimiziň ýaş nesillere döwrebap bilim bermek we ylmy ösdürmek baradaky tagallalaryndan ugur alyp, Türkmen oba hojalyk institutynyň Oba hojalygynyň meliorasiýasy kafedrasynyň “GeoGIS” ylmy gurnagy Bütindünýä meteorologiýa güni mynasybetli “Meteorologiýanyň esaslary” atly test bäsleşigi geçirdi. Bäsleşik talyplaryň atmosfera hadysalaryna, howa çaklamalaryna we gidrometeorologiýa bolan höwesini artdyrmak, olaryň nazary we amaly bilimlerini barlamak maksady bilen gurnaldy.

Bäsleşigiň dowamynda talyplar meteorologiýanyň häzirki zaman meseleleri, atmosferanyň fizikasy we howanyň üýtgemeginiň ylmy esaslary boýunça öz başarnyklaryny görkezdiler. Munuň özi ýurdumyzyň ylym we bilim ulgamyny kämilleşdirmek, halkara ülňülerine laýyk gelýän, döwrebap tehnologiýalardan baş çykarýan ýokary hünärli hünärmenleri taýýarlamak baradaky döwlet syýasatynyň iş ýüzündäki dabaralanmasydyr. Geljekde hem şeýle bäsleşikleriň yzygiderli geçirilmegi, ýaş meteorologlaryň kemala gelmegine we Türkmenistanyň ylmy kuwwatynyň has-da berkemegine ýardam eder.

Gyzgalaňly geçen test bäsleşigiň netijesinde, özleriniň çuňňur bilimleri we takyk hasaplamalary bilen beýlekilerden saýlanan talyplar, ýagny: Agroekologiýa hünäriniň 2-nji ýyl talyby D.Myratgeldiýewa, Ýer gurluşygy we kadastrlar taýýarlyk ugrunyň 3-nji ýyl talyby J.Nurmyradow, Ýyladyşhana hojalygy hünäriniň 1-nji ýyl talyby E.Seýitmuhammedowa, Ýyladyşhana hojalygy hünäriniň 2-nji ýyl talyby R.Miriýewa ýokary netijeleri görkezip, bäsleşigiň ýeňijileri boldular. Bäsleşigiň ýeňijileri we işjeň gatnaşan talyplar Hormat hatlary bilen sylaglandylar.

Bäsleşige gatnaşyjylar ýaşlaryň ylymly-bilimli bolmagy, dünýä ülňülerine laýyk gelýän hünärmenler bolup ýetişmegi ugrunda giň mümkinçilikleri döredýän Gahryman Arkadagymyza hem-de Hormatly Prezidentimize çuňňur minnetdarlygyny bildirdiler.

Amangül NARBAÝEWA,
Oba hojalygynyň meliorasiýasy
kafedrasynyň mugallym-öwrenijisi