“OBA HOJALYGYNDA TEBIGY BAÝLYKLARY REJELI PEÝDALANMAK” ATLY SANLY ULGAM ARKALY II HALKARA YLMY-AMALY MASLAHAT GEÇIRILDI

Türkmen oba hojalyk institutynda 2026-njy ýylyň 22-nji aprelinde “Oba hojalygynda tebigy baýlyklary rejeli peýdalanmak” atly sanly ulgam arkaly II halkara ylmy-amaly maslahat geçirildi.

Maslahat ýurdumyzyň alymlary, mugallymlary, talyp ýaşlary, şeýle hem onlaýn platformasynda birnäçe daşary ýurtly hünärmenleri ýygnandy. Forumyň esasy maksady, ekologiki ulgamlara täsirleriň ýokarlanmagy we howanyň üýtgemegi şertlerinde oba hojalygynyň durnuklylygyny ýokarlandyrmak üçin tebigy baýlyklary rejeli peýdalanmagyň ýörelgelerini, tehnologiýalaryny we çemeleşmelerini ara alyp maslahatlaşmak.

Maslahatda Azerbaýjandan, Bangladeşden, Belarusiýadan, Bolgariýadan, Gazagystandan, Gyrgyzystandan, Hytaýdan, Moldowadan, Mongoliýadan, Päkistandan, Russiýadan, Täjigistandan, Türkiýeden, Wengriýadan, Wýetnamdan, Özbegistandan wekiller oba hojalyk pudagynyň durnukly ösüşinde tebigy baýlyklary rejeli peýdalanmagyň orny barada sanly ulgam arkaly täsirli çykyş etdiler.

Türkmen oba hojalyk instituty, ýurdumyzyň öňdebaryjy oba hojalyk instituty we ylmy merkezi bolmak bilen, oba hojalygynyň ösmegine we bu pudak üçin ýokary hünärli işgärleriň taýýarlanmagyna işjeň goldaw berýär. Halkara maslahatyň geçirilmegi, Türkmenistanyň ylmy potensialy güýçlendirmek we bu ugurda halkara hyzmatdaşlygyny giňeltmek islegini görkezýär.

Çäräniň onlaýn formaty giňden gatnaşmaga mümkinçilik berdi we ýurdumyzyň hem-de daşary ýurtly hünärmenleriň arasynda işjeň gepleşikleri ýeňilleşdirmäge mümkinçilik döretdi. Geçirilýän şeýle maslahatlar ýurdumyzyň oba hojalygyny ylmy esasda ösdürmekde, dünýä döwletleriniň arasynda ylym-bilim hyzmatdaşlygyny has-da berkitmekde, halklaryň arasynda dostluk-doganlyk gatnaşyklaryny pugtalandyrmakda uly ähmiýete eýedir.

Babageldi KURBANOW,
Türkmen oba hojalyk institutynyň
Ylym bölüminiň başlygy