Medeniýet we sungat işgärleriniň hem-de Magtymguly Pyragynyň şygryýet güni mynasybetli ylmy-amaly maslahat geçirildi

Berkarar döwletimiziň täze eýýamynyň Galkynyşy döwründe eziz Diýarymyzda Medeniýet we sungat işgärleriniň hem-de Magtymguly Pyragynyň şygryýet güni mynasybetli, institutymyzyň gurnamagynda 2026-njy ýylyň 22-nji iýunynda “Milli medeniýetimiz we sungatymyz halkymyzyň ruhy baýlygydyr” atly ylmy-amaly maslahat ýokary guramaçylyk derejesinde geçirildi. Hormatly Prezidentimiz Serdar Berdimuhamedowyň parasatly ýolbaşçylygynda amala aşyrylýan medeni-ylmy özgertmeleri, halkymyzyň baý ruhy mirasyny hem-de akyldar şahyr Magtymguly Pyragynyň şygryýet dünýäsini dabaralandyran bu maslahatda, institutyň uly mejlisler zalynda birnäçe gymmatly ylmy hasabatlar diňlenildi. Maslahatyň umumy mejlisiniň dowamynda Jemgyýeti öwreniş ylymlary kafedrasynyň mugallymy H.Ýuldaşewanyň “Ýaşlara ahlak terbiýesini bermekde Magtymguly Pyragynyň öwüt, nesihat häsiýetli goşgularynyň ähmiýeti baradaky çykyşy hem-de Maldarçylyk kafedrasynyň mugallymy S.Meredowanyň “Türkmenistanyň halkara medeni gatnaşyklaryny berkitmekde Magtymguly Pyragynyň şygryýetiniň orny” baradaky çykyşy özüniň çuňňur ylmy seljermeleri we baý mazmuny bilen gatnaşyjylarda aýratyn täsir galdyrdy.

Maslahatyň ahyrynda gatnaşyjylar ýurdumyzyň ylmynyň we biliminiň yzygiderli ösmegine, ýaşlaryň döwrebap bilim almagyna, şeýle hem ýurdumyzda daşky gurşawy goramak we ekologik abadançylygy üpjün etmek ugrunda giň şertleri döredip berýän türkmen halkynyň Milli Lideri, Gahryman Arkadagymyza hem-de Hormatly Prezidentimiz Arkadagly Gahryman Serdarymyza çuňňur minnetdarlyk hem-de tükenüksiz alkyşlar bildirdiler.

Esen AMANKULYÝEW,
Türkmen oba hojalyk institutynyň mugallym-öwrenijisi